TURA: Adita jarangna kamrangko ka·gija jingjengatani ja·man Garo Hills Autonomous District Council (GHADC)-o kam ka·enggiparang, Sombar sal dipet kamtangtangko ka·piltaina a·bachengahani gimin GHADC-o kam ka·giparangko Garoland State Movement Committee (GSMC) mittelpilangaha.
GHADC-o kam ka·enggiparang bilsi gittam ong·na sipile dormaharangko man·tokkujaengani gimin, ia bilsini a·bachengaonin kamrangko ka·gija jingjengatna a·bachengahachim indiba adita salrangna skang, uamang GHADC-ni executive committee aro dingtang dingtang dolrang baksa agangrikanio, jabongani dormahako ra·chake kamtangtangko ka·piltaina ku·rachakangahachim ine nikna man·a.
GHADC-o kam ka·giparang, da·o executive committee-ni on·enggipa jabongani dormahako ra·chakgenchimoba jagnini gisepon uamangni man·na nangkuenggipa dormaharangko gital pay scale-o on·skachina niamko donangskaahachim.
Indake ong·engon, A·chik a·songna aro A·chik a·songo songdongenggipa manderangni namgnina kamrangko ka·piltaina a·bachengahani gimin GHADC-o kam ka·giparangko GSMC mittelpilangaha aro ian mikkangchi A·chikrangni niam retiko rakkina kam ka·enggipa GHADC-o namroro silroroaniko ra·bana dakchakani ong·gen ine parakataha.
GHADC-ni gital executive committee-ko re·dilenggipa Chief Executive Membor Benedic R Marak, Chairman Rakesh Sangma aro Deputy CEM Nikman C Marak-ni dilanichi council-ko nama ramao chalaiangna man·gen aro A·chik jatna namroro silroroaniko ra·bachongmotgen ineba GSMC-ni dilgipa Bostone M Sangma, an·tangni ka·dongchakenganiko parakataha.
GHADC-o kam ka·enggiparang Sombar sal dipet kamrangko ka·chakatpiltaiahani gimin council-o maiba kam nangchongmota donggipa manderang, COVID-19-ko warachakna dongimin niamrang aro district administration-ni ge·etgimin niamrangko ja·rike kamtangtangko ka·angna chol man·gnok ine GHADC-ni CEM Benedic R Marak-ba, uni Facebook page-o jinmana parakataha.
GHADC-o kam ka·giparang kamtangtangko ka·piltaianina GSMC mittelpila
Date:
Share post:
