SHILLONG: Meghalaya a·dokni dingtang dingtang private hospital-rango COVID man·e sanna bananirangko ra·enggipa manderang bang·bea tangka paisarangko gamna nange neng·nikanirangko chagrongna nangtokengani gimin private hospital-rangna sorkarini gita damko tik ka·e on·china a·dokni Opposition Congress dol, a·dok sorkariko didiangaha.
“Assam a·dokode pilak private hospital-rangnan Assam sorkari damko tik ka·e on·manaha aro ia dongimin damna batede ra·jachina ge·etaniko on·manaha,” ine East Shillong-ni Congress MLA Ampareen Lyngdoh, Assam sorkariko mittelpilangenba, Meghalaya a·dokona apsan daken COVID sanenggipa manderangna dakchakaniko on·china MDA sorkariko didiangaha.
Apsan daken, Mawsynram-ni Congress MLA HM Shangpliang-ba Meghalaya a·dokni private hospital-rango damrangko tik ka·e on·kujaengani gimin sorkariko matnangataha.
“Manipur a·dokko niatbo, uamangode ICU-ni oxygen palangrangba batbewal salprako gong 10,000-san. Indide maini gimin Meghalaya sorkari iako dakna man·jaenga?” ine Shangpliang sing·doangaha.
“Na·a an·tangan chief minister ong·e a·dokko sason ka·enga ong·ode pilak kamrangkon an·tangsa ka·na nanga. Maini gimin gipinrangsa iakode indake dakbo, iako indake dakbo ine agantimna nanga,” ine Congress MLA matnangatenba, ua manderangna simsakgipa aro ka·sabebegipa ong·ode ia kamrangko ka·na nanga ine dabiangaha.
COVID giproroaniba a·songo a·sel ong·ani gitan ong·engani gimin COVID man·gipa sakantinan sorkari korosko gamna nangachim aro je manderangan an·tangtangni korosrangko gamenga, uamangna komibeoba lak 4 tangkarangko on·skana nanga ineba Congress MLA aganaha.
Meghalaya a·dokni badiaba badiaba private hospital-rangode COVID-ko sannanio salsnion gong lak 1.50-mangoni gong lak 4-mang gapengachim ine kobor on·aha.