TURA: Tura-ni Sampalgre jolo donggipa Missionaries of Charity Home-o gimik sak 16 manderang, COVID-19-na porikka ra·anio positive ong·ahani gimin ia biapko ‘micro containment zone’ dakataha ine West Garo Hills a·jani Deputy Commissioner Ram Singh u·iataha.
Deputy Commissioner-ni u·iatani gitade, ia Missionaries of Charity Home-ko micro containment zone dakatahani gimin gipin biaprangoni darangba ia biapona re·bana man·jawa aro ia biapo donggipa manderangba ia biaponi ong·katna man·kujawa.
Ia ge·etaniko manijagenchimode Disaster Management Act 2005 aro IPC-ni dongimin dingtang dingtang niamrango pangchake rakgipa ja·kurangko de·anggen ineba Deputy Commissioner u·iataha.
Ia biapo COVID-19 batrikrikangjana gita ia biapko micro containment zone dakengmiting somoio, gipinrangkoba porikka ra·e nianggen ineba Deputy Commissioner u·iataha.