SHILLONG: Meghalaya a·doko COVID-19-ko nambate warachakna aro COVID-19 man·gipa manderangko nambate nirok sandina man·na gita block ge·antion corona care centre-rangko kulichina People’s Democratic Forum (PDF), a·dok sorkariko didiangaha.
Iani bidingo a·dokni Chief Minister Conrad K Sangma-na sedoatengon, a·dokni block ge·antion corona care centre-rangko kuligenchimode hospital-rango neng·nikanirangko namatna man·gen ine PDF-ni president Banteidor Lyngdoh, ku·pattianiko on·ataha.
Seokgimin mitam C&RD Block-rangko corona care centre dakna man·gen ineba Lyngdoh, chief minister-na seatgipa chittio parakataha.
Lyngdoh-ni parakatani gitade, bang·bata songrangon chin gri COVID man·gipa manderangko donchakna gita COVID-19 isolation centre-rangko kuliaha aro sorkari, iandakgipa isolation centre ba community quarantine centre-rangna dakchakanirangko on·na nangenga.
“Chingni kobor man·soani gitade, COVID-19 man·gipa manderangna on·gipa oximetre-rangba name kam ka·tokjaenga, uni gimin ia ostrorangko bodolna gita health department-ko u·iatchina chinga mol·molenga,” ineba PDF-ni president, chief minister-na seataha.
Community COVID-19 volunteer-rangna training-rangko on·na nangengani giminba PDF-ni president, chief minister-na seatgipa chittio janapataha.
“COVID-19-ko warachakanio dakchakna gita bang·a songrangon COVID-19 team ba COVID-19 task volunteer-rangko songaha aro iandakgipa volunteer-rangna training-rangko on·an baksana PPE-rangkoba on·china chinga nangnikenga,” ine Lyngdoh parakataha.