SHILLONG: Meghalaya a·dokni Chief Minister Conrad K Sangma aro Power Minister James K Sangma-ni kam cholijani a·sel da·o MeECL-ni obostarang namjabatroroengaha aro uamang adasa sakgni da·o MeECL-ko gipin a·dokni company-rangna pale cha·na siengaha ine Mongolbar salo Congress dolni MLA Zenith M Sangma matnangataha.
MeECL-ko chalaina gita gipin company-rangna pakwate on·na miksonganiko jegalenggipa dingtang dingtang dolrangni gimin janapatengon, ia dolrang Conrad Sangma-chi dilenggipa sorkario bakrimenggipa dolrangan ong·e, ia kamko jegalmanchaengama ma manderangna dakmikanisan ong·engama ine Zenith sing·doataha.
MeECL-ni mitam distribution circle-rangko REC-PDCL-na pakwate on·skana miksongengani gimin MDA-o bakrimenggipa UDP, PDF, BJP aro dingtang dingtang dolrangba jegaltokengachim ine nikna man·a.
“MeECL-o tangka jakkalsretanirangko anga bilsisana skangan katta ong·katatahachim aro da·o ia sorkari, MeECL-ko pale cha·na siengaha. COVID-19 giproroenganichi manderang neng·nikanirangko chagrongna nangtokengmiting somoioba Chief Minister Conrad Sangma aro Power Minister James Sangma-ni dilanichi ia sorkari MeECL-ko palgopnasa miksongskaengaha,” ine Congress MLA parakataha.
MeECL-ko gipin a·dokni company-rangna chalaina on·genchimode Congress dol, iako nie dongjawa aro a·doko songdongenggipa manderang baksa jinma jegalgrimna tom·aniko ong·atgen ineba Sangma parakataha.
