SHILLONG: Sorkari, University Grants Commission-ni gita, college-rango NCC (National Cadet Corps)-ko ge·sa elective subject dake ra·na gita cholko oe on·aha. Ia cholko oe on·anichi Cadet-rangna namen dakchakani ong·gnok.
Iarangni bidingo pilak dakgnirangkon, re·anggipa April 15 tarikon, UGC, pilak university-rangni Vice-Chancellor-rangna u·iatmanaha. New Delhi-o donggipa Directorate General National Cadet Corps-ni de·de pinnikaniko chanchie niani ja·mano NCC-ko college-rango ge·sa General Elective Credit Course (GECC) dake ra·chakaha. Unomitingo ge 91 college-rangode iako ra·gatman·aha.
National Education Policy 2020-ni Choice Based Credit System (CBCS)-o pangchakenba B aro C certificate-rangna NCC syllabus-rangko tariman·manaha, jeon ge 6 semester-rangna 24 credit point-rangko on·aha. Ia NCC-ko National Education Policy 2020-ni gita nangchape tariaha, jedakode institution-rangni on·gipa subject-rangna agreba chatro chatrirang namgniko basee ra·na man·gen. Course matchotani ja·man chatro chatrirangna credit point-rangko on·gen, jechin uamang uamangni degree-tangtangoni chu·sokangna man·gen.
Indake ong·engon, NEHU baksa chapatako man·gipa college-rango NCC-ko ge·sa elective subject dake ra·gatna gita NCC Group HQ Shillong jotton ka·enga ine parakaha.
