SHILLONG: Meghalaya a·doko COVID man·giparang ka·sinsin komiangahaoba, East Khasi Hills a·jao aro mongsongbate Shillong songjinmao COVID man·ani 10 percent batengkuani gimin da·o June 14 tariko matchotenggipa lockdown-ko ra·dodapangkunaba gnang.
Batanggimin sal 14-ni gisepo Meghalaya a·dok gimiko COVID-19-na porikka ra·anio positive ong·ani 12.84 percent ong·ahachim. Ia sal 14-ni gisepo Meghalaya a·dok gimiko sak 57,023-ko porikka ra·e niaha aro East Khasi Hills a·jaode sak 17,317-ko porikka ra·anio positive ong·ani 19.01 percent ong·skaahachim.
Bristibar salo, Meghalaya a·dok gimiko sak 603 manderang COVID-19 man·dapaha aro ia apsan salon sak 427 manderang, COVID-19-oni nampilskaahachim. Sal 13-na kingking COVID man·giparangna bate nampilgiparang bang·batahaoba Bristibar salo, changsataie COVID man·giparang, nampilgiparangna bate bang·battaiaha.
East Khasi Hills a·jao lockdown-ko ra·dodaptaiani bidingo Health & Welfare department-ni Principal Secretary Sampath Kumar-o sing·sandiaton, COVID man·ani 10 percent-na komigenchimosa da·o gita niamrangko olgrokatna man·gen ine parakataha.
5 percent-na bate komigenchimosa obostarangde namkalbatgen aro unode niamrangko olgrikatna man·genchim ineba ua aganaha.
Da·o dipet Meghalaya a·doko COVID-19-ni giproroaniko champengsrangna man·kuja ineba Health official parakataha.
“An·ching Meghalaya a·dokoba ‘Delta’ rokomni coronavirus maikai batrikrika, uko nikna man·aha. An·chingo COVID man·giparang batengkua aro batanggimin sak 10-14-ni gisepo Shillong-o positive ong·ani 17 percent ong·aha,” ine Kumar parakataha.
Nokdangtangtango mikrake dongna nangkuengani giminba Health official parakataha.