TURA: South Garo Hills a·jani Siju, Nengkong aro Karukol jolrango rama jal·langrang namsrangjae songni nokni manderang aro rama jal·langrangko re·ruraenggipa manderang neng·nikanirangko chagrongna nangtokenga ine GSU Karukol regional unit parakatenba, ia rama jal·langrangko ta·raken taripile on·china sorkariko didiataha.
GSU Karukol unit-ni president AZ Matsram N Marak-ni parakatani gitade, Baghmara-oni Siju-ona dakanggipa NH-62 ramako adita jarangna skangsan black topping on·e tariahachim indiba ia ramako tarigipa contractor-rang kamrangko name ka·jahani a·sel da·o adita jarangni gisepon nosto ong·piltaiengaha aro rama gimikon a·kolrara dakakosa nikna man·taiengaha.
“Rewak-Siju reserve ramakoba ru·uta bilsirangna galchipe donengani a·sel da·o salanti re·ruraenggipa manderangsa neng·nikanirangkode chagrongna nangtokengaha. Iana agreba, ia jolrango mobile network-rang namjani a·sel da·o gita online-chi class-rangko ra·na nangenggipa chatro chatrirang aro internet gita dingtang dingtang kamrangko ka·enggipa manderangba neng·nikanirangko chagrongna nangtokenga,” ine GSU Karukol unit-ni president parakataha.
Indake ong·engon, PMGSY scheme-ni ning·o 58-Siju-Rongara constituency-na gital rama dilbongako tarina chamatahachim aro ia project-rangko dingtang dingtang company-rang aro contractor-rang jako ra·e ka·engoba ia ramarangko tarianio maming namdapanirangko nikna man·jaenga ine GSU Karukol regional unit-ni president matnangataha.
GSU president-ni parakatani gitade, ia ramarangara, Nengkong-Upper Dosogre PMGSY rama, Karukol-Nengkong-Emangre PMGSY rama, Emangre-Nokatgre-Tolegre PMGSY rama, Karukol-Nengkong-Emangre PMGSY rama, Rongru A·sim-Bul A·kawe PMGSY rama aro Rongry-A·sim-Rewak PMGSY ramarang ong·achim.
“Uni gimin ia jolrango songdongenggipa manderangnasan ong·aigija South Garo Hills a·ja gimikni namgninan ia kamrangko niatchina anga MDA sorkariko didiatenga,” ine GSU Karukol regional unit-ni president AZ Matsram N Marak parakataha.