SHILLONG: Meghalaya a·doko covid sabisina lockdown-ko ong·atani somoio neng·nikaniko chagrongenggipa manderangna cha·a-ringanirangko suale on·ani bidingo tik ong·jaani gimin Opposition Congress, high level inquiry committee-ko songe sandirokaniko dakatchina a·dok sorkario dabiangaha.
Ia Food Corporation of India (FCI), Shillong-ni kam tik ong·gijaanichi Assam Boko-o Meghalaya-ni manderangna sualna tarisamsogimin mirong bosta laksa chipe dongimiinko Assam Police rim·a man·ahachim.
Ia koborko man·soani ja·mano Congress MLA, Ampareen Lyngdoh-ni parakani gitade, an·tangni jagokmanpilako parake Meghalaya-o songdonggipa manderangna sualna miksonganio bostao chipgimin mirongrangko bang·bee Assam Boko-ni ge·sa private godown-o chipe donskaako rim·a man·ahani gimin sandirokatchina dabiangskaaha.
Uandake a·doko damsaoni damgipinona mirong sualna tarisogiminko dingtangataniko ra·chakna man·gijani kam ong·aha ine jegalatengon, Lyngdoh, iani bidingo dos dakgipa mandeko rim·na man·a gita a·dok sorkari high level inquiry committee-ko seoke uamangni jakchi jakgitele sandirokna nanga ine dabiangengpn, uan Food Corporation of India-ni official-rangni kam ong·a ineba agandapaha.
“Ian Meghalaya-ni manderangni bil gnanganiko, dal·e niam pe·gipa ong·a. Unigimin dos dakgipa official-rangni kosako rakgipa ja·kuko de·e bichalona rimbana nanga,” ine Lyngdoh parakaha.
Minggipin gita Food and Civil Supply department-ni official-rangni parakatani gitde, a·dok sorkari NFSA aro PMJAY-o pangchake May aro June jarangna mirong sualna gita on·manahachim.
Official-ni parakdapangkuani gitade, da·ona kingkingba a·dokni manderang iani bidingo ku·rang on·gipa dongkujaenga. FCI-ni gita a·dokona mirong sualgniko gipin a·dokchi on·sretata donggenchimode FCI-ni niam gita chu·gimik mirongrangko mikkangchi manderangna suale on·anio maiba gualaniko nikgenchim.
“Jensalo FCI chingona sokbaa, unon chinga uamang baksa nigrike kam ka·angskagen,” ineba official parakataha.
