TURA: Tura, BJP-ni MDC Bernard Marak-ni GHADC-o Benedict R Marak-ni dilachi gital dake rikdilenggipa Executive Committee-na chakpaaniko da·ona kingkingba NPP ra·chakkujaenga aro ua maidakgipa miksonganio EC-na chakpaengachim uko nirikkie nikuenga ine koborna parakaha.
Mni Sukrobar salni bako Tura BJP MDC, an·tangni NPP-chi bakrime rikdilenggipa Garo Hills Democratic Alliance (GHDC)-ni Executive Committee-na chakpaani chittiko gitalgipa CEM, Benedic R Marak-na on·eahachim.
Indake ong·engon, ua maiko miksonganio NPP-chi bakrime rikdilenggipa GHADC-ni EC-na chakpaani chittiko on·eahachim uni bidingo party-ni chugipa gadangoni gita ra·chaka aro ra·chakkujaskal mamingkon agana man·kujaenga ine GHADC-ni CEM Benedic R Marak parakataha.
“Mejalo chingni ka·rimska BJP-ni MDC Bernard Rimpu Marak, da·o giatl riekenggipa EC-na chakpaani chittiko on·eaha. Anga GHADC-ni saksa CEM ong·e, iako parakatna namnika maina angni ka·rimskarang uni chakpaanina namen kusi ong·chakbea, indiba chingna party-ni chugipa gadangoni gita uni chakpaani chittiko ra·chakaniko chingna u·iatchengkujaskal iani bidingo chinga mamingkon agana man·kujawa,” ine NPP-chi rikdilenggipa GHADC-ni CEM, uni party-ni palo agan-parakataha.
CEM-ni parakani gitade, uni dilengachi rikenggipa GHADC-ni EC-o dalu constituency-ni gipin BJP MDC, Pramod Koch-ba jagnina skangonin Council-ni EC-ko rikchengaonin an·tangni chakpaaniko on·paaha.
“Chinga GHADC-ni EC-o Pramod Koch-ko party-ni chugipa gadangoni didiatako man·e uni EC-na chakpaaniko ra·chakaha. Uandake, angni a·bachengo agana gitan chinga Tura-ni BJP MDC-ni chakpaaniko nike kusi ong·bea, indiba uni GHADC-ni EC-na chakpaani bidingo ra·chakgen ba ra·chakjawa, uarangni bidingobe party-ni chugipa gadango bil man·giparangsa tik ka·angskagen. Uni gimin chinga da·o dipet iani bidingo agansona gita man·kujaenga,” ineba CEM Benedic Marak, ong·chongmotgipa koborko parakataha.
