RESUBELPARA: June 14 tarik dipet North Garo Hills a·jani Municipal area aro songrango donggipa dokkanrangko kulina on·anggnok ine North Garo Hills a·jani Deputy Commissioner RP Marak u·iataha.
Deputy Commissioner-ni u·iatani gitade, gnigipa changna COVID-19-ni giproroaniko champengna gita lockdown-ko ra·gatanio game ge·e cha·enggipa manderang, chonchona bading chiwalanirangko dake cha·enggiparang, salo hajira ka·e cha·enggiparang aro uandake kangal cholgrirang neng·nikanirangko chagrongna nangtokenga ine nikenba, sabisini giproroaniko champengna ja·ku de·anio manderangna janggi tangani cholrangkoba on·na gita North Garo Hills a·jao adita niamrangko taridapaha.
Uandaken, North Garo Hills a·jani municipal area aro songadam nokadamrango donggipa dokkanrangko, Sombar sal dipet pring 8:00 bajioni attam 2:00 bajiona COVID-19-ko warachakna dongimin niamrango pangchake kulina on·anggnok ine North Garo Hills a·jani Deputy Commissioner parakataha.
Indake ong·genchimoba, gital u·iataniko on·taikujaskal, salantian attam 4:00 bajioni pring 6:00 bajionade walni curfew-ko ra·gatangkugen aro Sonibar/Robibar salrangoba chu·gimik lockdown-ko ra·gatangkugen ine North Garo Hills a·jani Deputy Commissioner u·iataha.
Da·o dipet a·ja damsaoni damgipinona aro a·dok damsaoni damgipinona re·ruraanirangkoba champengatangkugen.
