TURA: Garo Hills Autonomous District Council (GHADC)-o MDC ong·gijagipa mande sakgniko kamo rakkie, saksako chief executive membor (CEM)-ni chief adviser aro sakgipinko high powered committee-ni chairman songahani gimin ian parliamentary-ni niamrangko pe·ani gita ong·enga ine NPP-chi dilenggipa Executive Committee-ko Congress dol matnangataha.
Re·anggipa antiosan saksa Akki A Sangma minggipa mandeko CEM-ni chief adviser aro Rudraswar Momin minggipa mandeko high powered committee-ni chairman dake Benedic Marak-chi dilenggipa GHADC-ni EC songe donangahachim.
“GHADC-o tangka paisani gita neng·nikanirangko man·engmiting somoio NPP-chi dilenggipa Executive Committee, ia official-rangko kamo rakkiskaenga. Ian NPP-chi dilenggipa Executive Committee-ni mikkangchina namgija dakmesokani aro uamangni dilsretaniko mesokani ong·enga. GHADC-o iandakgipa kamrangna da·o ong·enggipa Executive Committee dos ong·chongmota,” ine Congress dol parakataha.
Iandakgipa kamrangara gitcham aro da·o ong·enggipa Executive Committee-ni kam choligijaniko mesokani ong·enga ineba Congress matnangataha.
“MDC ong·gijagipa manderangko GHADC-ni chief adviser aro high powered committee-ni chairman songaniara parliamentary-ni niamrangko ja·rikgijani aro GHADC-o seoka man·gipa membor-rangna cholko on·gijani gita ong·chongmotenga. Ia official-rangko NPP-chi dilenggipa Executive Committee, seoka man·gipa MDC-rang baksa agangrikchenggija aro jinma vote ka·gijasa songe donaiaha,” ine GHADC-ni Congress spokesperson aro Williamnagar-ni MDC Alphonsush R Marak parakataha.
GHADC-o kam ka·enggiparang bilsi gittam ong·na sipile dormaharangko man·tokkujaengon, ia official-rangko GHADC-o rakkidapaniara council-na tangka paisani gita bojako ra·badapanisa ong·enga ineba Congress MDC parakataha.
