TURA: Garo Hills Autonomous District Council (GHADC)-na ma·mong sorkarini chamatgipa gong kror 100.71 tangka baksana 2015-16 aro 2017-20 bilsirangni gisepo Finance Ministry-ni council-na chamatgipa tangka paisa jakkalsretaniko CBI-ni am·sandiatchina gita didie, GHADC-ni Non-Gazetted Employees Association (NGEA), a·songni Prime Minister Narendra Modi-na sedoataha.
Prime Minister-na sedoatgipa chittio NGEA-ni parakatani gitade, GHADC-na chamatgipa gong kror 100.71 tangkarangoniko gong 69,21,44,816-kode dingtang dingtang project-rangna skangan oksomanaha ine GHADC-o see rakkigimin dongachim.
“2015-16 bilsio ming 1167 project-rangko Garo Hills-ni dingtang dingtang biaprango ra·gataha ine report-ode parakaha indiba ia project-rangoni bang·batan matchotchipgija dongengkua, mitamrangkode contractor-rangan matchotatgija galchipaha aro mitamde bimangan dongsrangja,” ine NGEA-ni president Senora Johny Arengh parakataha.
Garo Hills-ni dingtang dingtang biaprango ra·gatgipa gong kror 69-na batgipa project-rangni ja·mande gong 31,49,55,184 tangkarangni giminde maming see rakkianirangan dongsrangja ineba NGEA-ni president matnangataha.
NGEA-ni parakatani gitade, ia project-rangni bidingo RTI-ko ka·on, ma·mong sorkarini chamatgipa tangkarangchi, gong 5,82,51,800-ni video documentary film-ko tariaha aro gong 6,01,31,100 tangkarangchi Tura-o members hostel-ko rikaha ineba RTI report-o parakahachim. Ia minggni project-rangna dongimin somoirang bon·ahaoba da·onan ia project-rang matchotchipkujaenga indiba tangkarangkode 60 percent-ko oke ra·manaha ine NGEA-ni president parakataha.
Iarangna agreba ma·mong sorkarini gita bang·en GHADC-na tangka paisarangko chame on·atahachim ine janapatengon, 2017 bilsini December jao 28,66,40,000, 2019 bilsini June jao 13,60,00,000-ko aro 2019 bilsini March jao 31,00,40,000 tangkarang baksana 2017-2020 bilsitrangni gisepoba bang·en GHADC tangka paisarangko man·soahachim ine NGEA-ni president parakataha.
Indake ong·engon, GHADC-na chamatgipa tangka paisarangni bidingo CBI-chi am·sandiatenba, tangka paisa jakkalsretgipa manderangni kosako nanga gita ja·kurangko de·angchina NGEA, a·songni Prime Minister-ko didiataha.
