TURA: South Garo Hills a·jao skul nokrang namsrangjaengahani a·sel aro skigiparang chu·ongjaengani a·sel poraienggipa bi·sarang neng·nikanirangko chagrongna nangtokenga ine GSU Mindikgre regional unit-ni president Greneth M Sangma parakatenba, iani bidingo niroke ja·kuko de·angchina gita a·dokni Chief Minister Conrad K Sangma-ko didiataha.
South Garo Hills a·jao contractual skigiparangni kamko bon·atani ja·man ia skigiparangni biapo gital skigiparangko rakkikujaengani a·sel dam 26 skulrangko chipe donna nangengaha ine adita salrangna skangba GSU Mindikgre unit-ni president parakatahachim.
Indake ong·engon, South Garo Hills a·jao nosto ong·e dongenggipa skul nokrangko ta·raken taridape on·china aro kamoniko ra·gala man·gipa skigiparangni biapo ta·raken gital skigiparangko rakkidape on·china gita GSU-ni president, a·dokni Chief Minister-na sedoataha.
Baghmara SDSEO-ni on·atgipa report-ni bidingo janapatengon, South Garo Hills a·jani gimik dam 512 skulrangoni dam 66 skulrango skigiparang chu·ongjaenga aro dam 99 skigiparangni biapko gapatna nangkuenga ine GSU Mindikgre unit-ni president parakataha.
Kamoniko ra·gala man·gip skigiparang, maming janggi tangani cholrang dongjae neng·nikanirangko chagrongna nangtokengani gimin iandake kamoniko ra·gala man·gipa skigiparangnaba MTET porikkako ong·atpiltaichina gitaba Greneth dabiangaha.
