SHILLONG: Meghalaya Energy Corporation Limited (MeECL)-o tangka jakkalsretani aro gipin kam ka·sretanirangko am·sandiatna gita Meghalaya sorkari, inquiry dakdilnagipa manderangni bimingko sengengkua ine Sombar salo a·dokni Chief Minister Conrad K Sangma parakataha.
Chief Minister-ni parakatani gitade, MeECL-o ong·gija dakanirangko sorkari jakgitele, nama bewalo am·sandiatna nangnikengani gimin inquiry dakdilnagipa official-rangni bimingna sengkuenga.
Inquiry dakdilnagipa officer-rangni bimingrangko da·o political department aro a·dokni Chief Secretary name nipilengkua ine janapatengon, inquiry-ko jakgitele aro nama bewalo dakna gita kragipa official-rangko seokna nangchongmota ine Chief Minister parakataha.
Kobor on·timgiparangni u·iatani gitade, ia inquiry-ko gitcham judge dilanggen aro ia inquiry committee-o administration-ni membor sakgni, retired officer aro technical person-ba donggen.
Ia inquiry-ko dake report-ko on·na gita committee, komibeoba ja 4 ba ja 6 somoirangko man·gen.
