TURA: Meghalaya a·doko me·chik police-rangko bilakdapatna man·na gita, me·chik police-rangko kamo rimani bewalko adita dingtangatchina A·chik Youth Council (AYC), a·dokni Chief Minister Conrad K Sangma-na sedoataha.
AYC-ni general secretary Maxbirth Gabil-ni chief minister-na sedoatgipa chittio janapatani gitade, Meghalaya a·doko aro mongsongbate Garo Hills-o me·chik police-rang chu·ongjaengani a·sel me·chikrangni kamrangko ka·anio Meghalaya Police neng·nikanirangko man·tokna nangenga aro uandaken Meghalaya a·doko me·chik police-rangko baridapatna nangengachim.
“Police dolrango me·chikrangko bang·batatna gitade, me·chikrangna biap kangani 33% ong·na nangenga. Garo Hills-ni women police station-rango me·chikrangni kamrangko nambate ka·na man·na gita bang·bata me·chik police officer-rangko nangenga,” ine AYC-ni general secretary parakatenba, iani bidingo ja·kuko de·angchina gita Chief Minister-ko didiataha.