SHILLONG: East Jaintia Hills a·jani Umpleng jolo donggipa Krem Ule-ni koela a·kolo gimaenggipa sakbonga manderangoni saksani manggisikode Budbar salo Indian Navy, NDRF aro SDRF-ni sipairang ra·ongkatpilna man·aha.
Koela a·kolo gimaenggipa manderangoni sakgnini manggisiko Mongolbar salon Navy-ni chi ripgiparang, koela a·koloniko nikahachim indiba ia sakgnioni saksani manggisikosan Budbar salo ra·ongkatna man·engkua ine official-rang u·iataha.
“Koela a·kolo gimaenggipa manderangoni saksani manggisikode chinga koela a·koloniko man·pilaha aro da·o ia manggisiko uni nokdangna pakwate on·atna sengenga,” ine Budbar salo official-rang parakataha.
Ia koela a·kolo gimaenggipa sakgipin mandeni manggisiko Bristibar salo ra·ongkatskana man·naba gnang ineba official-rang parakataha.
Re·anggipa May jani 30 tariko Sutnga Elaka-ni koela a·kolo dynamite boma gopretani ja·man rang·san ia koela a·kolo chi napenba ia koela a·kolo koela bikotenggipa sakbonga manderang gimaengachim.
Ia koela a·kolo gimaenggipa manderangoni sakbride Assam-ni aro saksade Tripura a·dokoni ong·achim.