TURA: Tura jillani dingtang dingtang gittimrango donggipa badiaba badiaba nokdangrang septic tank ba soak pit-rangko jakkalgija paikanani moilarangko aro chirangko, chiring chibisikrango watenga ine koborko man·soahani gimin mikkangchi iandake paikanani moilarangko chiringrango watjachina gita Tura Municipal Board (TMB)-ni Chief Executive Officer, mikrakataniko on·angaha.
CEO-ni parakatani gitade, da·ororo dingtang dingtang sabisi sakanchirang giproroengon iandake paikanani moilarangko chiringrango watanichi manderangna namgijagipa sabisirangko ong·atna man·a aro Tura jillani badiaba badiaba biaprangode manderang chiring chibisikrangkon dingtang dingtang kamrangna jakkaltokengani gimin ian chiko jakkalenggipa manderangna namgijako ra·baani gita ong·enga.
Iandake paikanani moilarangko chiring chibisikrango wataniko champengna gita mikkangchi TMB-ni manderang, dingtang dingtang gittimni development committee-rang baksa sandie kamrangko ka·anggen ineba TMB-ni CEO parakataha.
Indake ong·engon, Tura jillao namroro silroroaniko ra·bana gita inter-locality wall painting/mural competition-ko re·baenggipa November jao ong·atgen ineba TMB-ni CEO parakataha aro ia susaanio bakko ra·na gita an·tangtangni nangchongmotgipa bosturangko see da·o June jani 25 tarikna skangan TMB-ona sokatchina gita dingtang dingtang gittimni development committee-rangko didiataha.