SHILLONG: Meghalaya a·doko game ge·e cha·giparangna, Tribal Affairs Ministry-ni gita TRIFED program-ni ning·o, uamangni game ge·e man·gipa bosturangko palna sim·na gita dakchake on·na miksongenga.
Bristibar salo Shillong-ni MP Vincent Pala, internet gita Union Tribal Affairs Minister baksa chanchirimangaha aro uni parakatani gitade, a·doko game ge·e cha·enggipa manderangni man·enggipa bosturangko palna sim·na gita TRIFED-ni ning·o Tribal Affairs Ministry dakchakanirangko on·na man·gen.
Meghalaya a·doko smu aro buring bolgrimrango man·gipa dingtang dingtang bosturangko altuaen man·ani gimin game ge·e cha·giparangna iandakgipa bosturangko bading chiwalani bidingo skie on·na man·gen ine ia tom·anio Union Minister aganaha.
Meghalaya a·doko ia program-ko jako ra·enggipa nodal agency-ara Meghalaya Basin Development Agency (MBDA) ong·engachim.
Meghalaya a·doko ia program-ko chu·sokatna man·genchimode a·dokni game ge·e cha·giparangba Flipkart aro Amazon gita dakgipa website-rang gita an·tangtangni bosturangko palna sim·na man·e bang·en namgni ong·genchim ine Shillong-ni MP parakataha.
Game ge·e cha·giparangni man·enggipa bosturangko pack ka·ani bidingo skie on·an baksana dingtang dingtang dakchakanirangko on·na nangenga ineba ia tom·anio Pala aganaha.
