Shillong: Shillong Municipal Board (SMB)-ni employee-rang aro Civil Defence and Home Guards (CD&HG)-ni volunteer-rang, Namgipa Samariani mande dake, ia sajinmani somoirango jriprjip mande jatna gisiko nangbee dangdike on·enga.
SMB-ni employee-rang CD&HG, Shillongo COVID-19 Death Management Team (CDMT)-ni bakan ong·a, jemangan uamangni janggirangna daito ra·enba COVID-19 sabisiko man·e sianggipa manggisirangko jako ra·enga.
Jripjrip kam ka·enggipa sak 40 heroes ba matgrikrang, dolbri dake suale kamrangko ka·enga, jemangan da·sikkarionin chanbae sak 450-na batpilen, COVID-19 man·e sianggipa manderangko mandera·e gopaha aro mitamko so·ahachim.
An·tangni mikkangchake ma·sigiminrangko agan-talate on·engon, uamang skanggipa changna a·doko COVID man·e sichenggipa Dr John L. Sailo Ryntathiang-ni manggisiko jakdangdikna nangao ga·akaha ine SMB Solid Waste Management Assistant Manager, Maskal Lyngdoh aganaha.
‘‘Unomitingode skanggipa chang ong·ani gimin COVID-19 sabisiko man·e sigipa Dr. Sailo sagini manggisiko maidake gopna nanga, uani bidingo health department-ni on·gipa guideline-rangkoba namedakede talkujachim, jeni manggisikon bon·kamao, Lawmali, Shillongo gopaha,’’ Lyngdoh aganaha.
Uni aganani gitade, SMB Chief Executive Officer (CEO), Batlang S. Sohliya aro Executive Engineer, FB Chyne mangsa uamangna, PPE-rangko, glove-rangko aro mask-ko maikae ganna nangachim uarangko skie on·tokahachim.
Indake ia sabisi sajinmani somoio uamang mande jatni duk mikchini somoio maming jechakani grian mande jatna dakchakaniko on·enga ine nikatna man·a.
