TURA: Da·o dipet Meghalaya a·doko NEET aro JEE-ni entrance examination centre Shillong-osan dongkuengani a·sel ia entrance porikkako seenggipa Garo Hills-ni chatro chatrirang, re·a doanio aro dongchakanirango neng·nikanirangko chagrongna nangtokengani gimin Garo Hills-oba chatro chatrirangni namgnina ia entrance examination centre-ko damsa kulie on·china gita ma·a paarang, a·dokni Chief Minister Conrad K Sangma-ko didiataha.
Iani bidingo a·dokni Chief Minister-na sedoatengon, da·o dipet Meghalaya a·doko NEET aro JEE-ni entrance examination centre Shillong songjinmaosan dongkuenga aro da·o gita sabisirangni giproroani somoirango Shillong songjinmaona songreangani aro donga cha·anirango bang·en koros ong·e chatro chatrirang neng·nikanirangko chagrongna nangenga ine ma·a paarang parakatenba, Garo Hills gimikna ia porikka sechakani centre-ko damsa kulie on·genchimode Garo Hills-ni chatro chatrirangna dakchakani ong·begen ine parakattokaha.
“Garo Hills-o bang·bata nokdangrangan inditana cholipagiparang ong·ja aro Shillong-ni hotel-rango salgni salgittam dongna nange chatro chatrirang, tangka paisani gita neng·nikanirangko chagrongna nangengani gimin Garo Hills gimikna Tura-o ia porikka sechakni centre-ko kulie on·na nangenga,” ine ma·a paarang parakataha.
Da·o gita sabisi giproroani somoirango Shillong-ona re·ange porikkako sena nanggenchimode sabisiko man·ani cholrangba donga indiba Tura-o ia porikka sechakani centre-ko kuligenchimode Shillong-oba porikka seenggipa chatro chatrirangko komiatani gita ong·e sabisi batrikrikani cholkoba komiatani gita ong·gen ine Garo Hills-ni ma·a paarang parakataha.
Shillong centre-o seat-rang chu·onga gita dongjani a·sel bang·bata chatro chatrirangan ia porikkako sena chol man·jaenga ine janapatengon, porikkako sena seat man·jaengani gimin Garo Hills-ni bang·bata chatro chatrirangan gipin a·dokrangonasa re·ange ia porikkarangko seskana nange dingtang dingtang neng·nikanirangko chagrongna nangtokenga ine Garo Hills-ni ma·a paarang parakataha.