SHILLONG: Shillong-ni Congress MP Vincent Pala-kon Meghalaya Pradesh Congress Committee (MPCC)-ni president-na chol dongbatenga ine agantokengoba ua an·tangde ia kamko jako ra·na nangnikskajaenga ine parakataha.
Iani bidingo kobor ra·timgiparang baksa agangrikengon, ua New Delhi-osa kamko ka·engani gimin Meghalaya a·dokni kamrangkode niatna neng·ani ong·gen indiba Congress dolni dilgiparangan ia kamko una on·enga ong·ode ua jechakna man·jawa ine Bristibar salo Pala parakataha.
MPCC-ni gital president-ko songani bidingo Congress dolna kam ka·enggipa manderangni nangnikanirangko ra·na re·baani somoionin AICC-ni dilgiparang iani bidingo chanchitaia dongkuja ine janapatengon, uni ja·man a·song gimikon COVID giproroani a·sel aro lockdown-rangko ra·gatani a·sel iani bidingo chanchitaina man·kuja ine Congress MP parakataha.
Charles Pyngrope gita dakgipa politician-rangko toede ua saksa chonbegipa politician gitasa ong·aienga ine janapatengon, ua Bristibar salon, MPCC-ni gital president-ko seokna gita kamrangko ta·rakatchina New Delhi-o donggipa AICC-ni dilgiparangna phone ka·e didiataha ine Pala parakataha.
“Anga chanchia gital president-rangko songna gita AICC kamrangko a·bachengengaha aro Kerala a·dokoba uamang dilgipako seokaha,” ine Shillong MP aganaha.
MPCC-ni president ong·e kamko ka·enggipa Dr Celestine Lyngdoh, kamko jako ra·angkuoba ua kusi ong·aigenchim ineba Pala parakataha.
