TURA: South Garo Hills a·jani Chokpot civil sub-division-ko songchengaoni da·o bilsibri batangpilengahaoba ia sub-division-o pilakni gita namroro silroroaniko nikna man·kujaenga ine Garo Students Union (GSU) Chokpot unit parakatenba, ia Chokpot civil sub-division-o namroro silroroaniko ra·bana gita kamrangko nirokatchina NPP-chi dilenggipa MDA sorkariko didiataha.
GSU Chokpot unit-ni general secretary Tangke R Marak-ni parakatani gitade, Chokpot civil sub-division-ko 2017 bilsini March jaon songahaoba da·alona kingkingan ia sub-division-o pilakni gitan namroro silroroaniko nikna man·kujaenga aro ia sub-division-o da·onan sorkari office-ni nokrangba chu·onga gita dongkujaengachim.
GSU Chokpot unit-ni parakatani gitade, Chokpot civil sub-division-o MeECL, CHC, PWD aro PHE-ni sub-divisional office-rang, ICDS, Tourism aro uandakgipa dingtang dingtang department-ni office-rangkoba namdapatna nangkuengachim.
Chokpot sub-division-ni ning·o da·o dipet degree college ge·samangmangsan dongengkupiti indiba ia college-o chu·onga gita poraiani cholrang dongjani a·sel ia college-o poraienggipa chatro chatrirang neng·nikanirangko chagrongna nangtokenga ineba GSU Chokpot unit-ni general secretary parakataha.
Indake ong·engon, Chokpot sub-division-ni rama jal·langrang namsrangjaengani gimin GSU Chokpot unit suk ong·gijaniko parakataha aro ia rama jal·langrangko ta·raken taripile on·china gita a·dok sorkariko didiataha.