SHILLONG: Meghalayao 0-14 bilsini ning·ogipa bi·sarang sak 5000-na batpilen COVID-19 sabisiko man·giparang dongaha aro uamangoni sak 17-de COVID sabision siangaha ine Health Minister A L Hek Sukrobaro aganaha.
Ua indakeba aganaha je COVID positive ong·gipa ma·giparangoni atchigipa bi·sa saksaba positive ong·e atchigipade da·odipet dongkujaenga.
Meghalayao 0-14 bilsini ning·ogipa sak 5,101 bi·sarang bilsignini gisepo COVID sabisiko man·aha. Indake da·sikkarioni chanbae gimikchi sak 17 bi·sarang COVID sabisio uamangni janggirangko gimaataha ine Health Minister aganaha.
U·i-ma·sigiparangni agansamsoani gita, ia bilsini ja·mano gittamgipa changna COVID sabisi sokbatainaba donga aro unode bi·sarangna kenchakani ong·batna donga ine agansogipani bidingo aganengon, Sorkari nangchongmotgiparangko nirgrike tarisamsoenga ine Pa Hek aganaha.
Iana tarisamsoengon A·dok sorkari, paediatric hospital-rangko Shillong, Tura aro Jowaio rikna tik ka·aha, ua aganaha.
Meghalayao da·o dipet sak lak 5.44 manderang COVID tikkarangko su·aha, uamangoni sak 75,000-de ponggnikon su·man·tokaha.
Meghalayao COVID-19 sabisiko man·giparang gimikchide sak 44,382 gapaha, uamangoni sak 38,792 manderang an·sengpilaha sak 771 sabisio siangaha aro da·o sak 4,812 manderang COVID man·e dongengkua.
