SHILLONG: Meghalaya a·doko salantian COVID-19-ko man·giparang batroroengkuani gimin sorkari, skul aro college-rangko kulina nangnikkujaenga.
Meghalaya a·doko da·o dipet skul aro college-rangko kulina gita sorkari maming miksonganirang dongkujaenga ine talatangengon, a·dok gimikon COVID-19-ko man·giparang batroroengkuani gimin skul aro college-rangko kulina somoi namkujaenga indiba salantian sorkari obostarangko name nirikkienga ine Education department-ni Additional Chief Secretary DP Wahlang parakataha.
COVID-19-ni a·sel porikka serikna man·gijagipa chatro chatrirangna SSLC aro HSSLC porikkarangko ong·attaiani giminba adita salrangna skangsan a·dok sorkari, MBOSE-ni official-rang baksa chanchirimangaha aro iani bidingo sorkari, June 23 tarikosa bon·kame chanchiangnaba gnang ineba u·iataha.
Meghalaya a·doko skul aro college-rang salantian internet gita class-rangko ra·engoba, Meghalaya a·doko aro mongsongbate songadam nokadamrangode network-rangko name man·pajani a·selan chatro chatrirang neng·nikanirangko chagrongna nangskaengachim.
Meghalaya Board of School Education (MBOSE)-ni ong·atanggipa Class X aro Class XII final porikkani result-rangko July jani skanggipa antio paraknaba gnang ine ka·dongsotokenga.
