SHILLONG: NPP-chi rildilenggipa MDA sorkarini a·doko dam 230 petrol pump-rangoniko Value Added Tax (VAT) bang·bata tangka-paisarangko man·rikna gita One-Time Settlement (OTS) scheme-ko a·bachengatna manchisoaniko opposition dilgipa Dr. Mukul Sangma jegalataha.
A·dok sorkarini gita petrol pump nokgiparangna OTS scheme-ko a·bachengatachi bang·bate tangka-paisa kamaiani cholrangko on·engani bidingo aganatengon, Sangma, petroleum product-na nokgiparang sorkarina kajinarangko gamanaha aro Value Added Tax-ni bidingo petrol pump nokgiparang namen ma·sitoka aro uarangan uamangni man·pilgnigipa ong·a ine aganaha.
“Uarangko petrol pump nokgiparangna on·pilnan nanggen,” ine opposition-ni dilgipa aganengon, ia chango a·dok sorkarini a·bachengatna manchienggipara chong·motgipa law (niam)-oni dingtangskaenga ineba ua janapatkuaha.
Sangma-ni matnangatani gitade, sorkari VAT-ko ramram manderangoni ba bading-chiwale cha·pagiparangoniko sorkarini man·gnigipa gita ra·enga indiba petrol pump nokgiparangni man·gnigipa gita chanskajaenga.
A·dok sorkarini taxation department, a·doko dam 229 petrol pump-rangoniko bilsi gittamrangna skangonin Value Added Tax (VAT), jean kror 650 tangka-paisarangko ra·na ja·manchakenga ine matnangahachim.
Opposition dilgipa a·doko manderangni nangchongmotgipa bosturangni damko rakbatatengaoniko niroke kamko ka·na ja·manchakenga ine matnangatkuengon, indakgipa kamrangni bidingo a·dok sorkari dingtang dakgipa ja·kurangko de·na re·mikkanganian dongja ine agandapaha.
“Uandgipa ma·sichrakpile bading-chiwalani ba palbadinganirangko sorkari an·tangna kanggope ra·aniko an·ching u·ina nanga,” ine Sangma parakatengon, da·ororo a·doko 50-100 per cent bosturangni dam baribatrikrikenga ineba ua aganangkuaha.
