Shillong: East Khasi Hills-ni Deputy Commissioner, Smti. Isawanda Laloo-ni kosako matnange adita salrangna skang Facebook aro uandakgipa gipin social media-rango ong·gija dake segatate jangbingbangatgipa bilsi 38-ni Donlad Shylla-ko rim·aha ine koborna u·iataha.
Laloo-ni kosako ong·gija dake facebook-o see jangatgipa mandeni kosako adita salrangna skangon Shillong Sadar Police Station-o suo moto case-o pangchake re·anggipa June 17, 2021 tarikon IPC, section 161(06)2021 U/S 354A (1)(iv)/509 aro DM Act 2005-ni R/w 51(b)-o pangchake mamlako segatangmanahachim.
East Khasi Police, Cyber Cell-ni parakatani gitade dos dakgipako uni jakkalgipa social media-ni gita am·sandie ra·anio uko West Jaintia Hills-ni Nongjngi songo dongenga ine nikna gita man·aha.
Indake ong·engon, West Jaintia Hills Police-ni dakchakpaanichi East Khasi Hills Police Special Cell, dos dakgipa Shri. Donlad Shylla-ko mejal Sonibar pringo uni dongchakram songoniko rim·e ra·bana gita man·aha.
Uandake dos dakgipa mandeni kosako bichal ka·na gita kachariona rimangchenggen aro uni ja·mano maini a·selo East Khasi Hills DC-ni kosako matnange social media-rango jangatahachim uni chong·motgipa a·selko sing·rikite ra·angkugen ineba East Khasi Hills, Shillong-ni Superintendent of Police, Shri. Sylvester Nongtnger, IPS koborna parakataha.
