Dingtang dingtang niamrangchi a·doko ra·gatgipa dolrangko bilgriatna jotton ka·enga ine janapatengon, tangka jakkalsreta ine matnanganirangko Lokayukta gita dakgipa dolrang, am·sandichina ge·etaniko on·on, pangnan sorkari iandakgipa kamrangko ka·sinate bilgriatna jotton ka·ronga ine Congress dolni dilgiparang parakataha.
Tangka jakkalsreta ine matnanganirangko jakgitele am·sandina man·na nanga ine janapatengon, “A·doko niam gri koela bikotanio tangka jakkalsretanirangko aro niam gri koela bikotanio nangchakegipa gipin kamrangni bidingo CBI-chi am·sandiatchina gita Lokayukta, a·dok sorkarina ku·pattianiko on·manahachim,” ine Congress dolni dilgiparang parakataha.
A·doko tangka jakkalsretanirangko aro niam gri koela bikotanirangko CBI-chi am·sandianirangko dakchina aganani somoirango pangnan sorkari, iandakgipa kamrangko jegalronga ineba Congress parakataha.
“Uamang sako chel·chakenga? Matnanganirangko jakgitele am·sandiatani pal jegalaiode uan a·dokna aro a·dokni manderangna namen kragijani ong·a. Uni gimin iandakgipa kamrangkode pangnan jakgitele am·sandina nanga,” ine Congress parakataha.
MDA sorkarini somoio ong·enggipa kamrangde a·doko niam gri dakanirangko aro tangka jakkalsretaniko warachakna ja·rikbaenggipa kamrangko ka·sine bon·atani gitasa ong·engaha ineba Congress dolni dilgiparang parakataha.
Tangka jakkalsreta ine matnanganirangko jakgitele am·sandina on·jagenchimode manderang ong·gija kamrangko aro tangka jakkalsretanirangko ka·angkuaigen ineba Congress parakataha.
Meghalaya a·doko niam gri koela bikotani, bijolini kamrango ong·gija dakani, JHADC-o Special Assistant Grant (SAG)-ko jakkalsretani aro uandakgipa kamrangko jakgitele am·sandiatchina dabiahaoba da·onan ia kamrangko jakgitele am·sandichina gita sorkari ge·eta dongkujachim ine nikna man·a.
