TURA: Adita salrangna skang Tura-o me·chikma saksani pale cha·enggipa me·surangko kragija dake pakrurue galahani gimin police-rangni kamko New Tura Development Forum (NTDF) raken jegalataha.
Adita salrangna skang, Tura-ni biap damsao me·chikma saksa me·su samjakrangko pale, dokkanrangko chipna somoi ong·ahani gimin an·tangni bosturangko chipna a·bachengengahachim indiba uandakmiting somoio police-rang ua biapona re·baenba, ia me·chikmani me·surangko pakrurue galangahachim.
Indake ong·engon, cholgri manderangni iandake pale sim·e cha·ako police-rangni kragija dakaniara namen ra·chakna man·gijagipa kam ong·aha ine NTDF parakatenba, niamrangko manijaenga ong·ode kraa gita dairangkosa ra·na nangachim ine talatangaha.
“Manderangni pale sim·e cha·enggipa bosturangko iandake pakrurue galanichide niamrangko rakkina man·ja indiba niam pe·gipa mandenade niamo pangchakesa dairangko ra·na nanga,” ine NTDF-ni general secretary L Ch Momin parakataha.
COVID-19 giproroengmiting somoio rakbee kamrangko ka·enganina police-rangko mittelpilangengon, lockdown-ni a·sel manderang aro mongsongbate kangal cholgrirang neng·nikanirangko man·tokna nangengani gimin ka·sachakani gnangsa kamko ka·na nanga ine NTDF didiangaha.
Ia a·selni bidingo ta·raken ja·kuko de·enba, ia me·chikmana dakchakaniko on·china West Garo Hills a·jani Deputy Commissioner aro Superintendent of Police (SP)-na ge·etaniko on·atskaahani gimin a·dokni Chief Minister Conrad K Sangma-koba NTDF mittelpilataha.
“Ia me·chikmana ta·raken dakchakaniko on·pilahani gimin chinga West Garo Hills a·jani DC aro SP-koba mittelpilna ska aro ia a·selni bidingo jinmana u·iate nanga gita ja·kurangko de·ahani gimin chinga GSMC aro GSU dolrangkoba mittela,” ine NTDF-ni general secretary Momin parakataha.
