TURA: Re·anggipa Sonibar salo, South Garo Hills a·jani police-rang, pekatgipa samrang baksana mande sakgniko rim·na man·aha.
Police-rangni u·iatani gitade, koborko man·soani ja·mano police-rang, South Garo Hills a·jani Sibbari jolo donggipa Baigankhona songoniko me·chik saksa aro me·asa saksako rim·na man·aha aro ia mande sakgnioniko police-rang, gram 64 ong·gipa rong 608 YaBa/Methamphetamine samrangko man·aha.
Iani bidingo police-rang, Baghmara police station-o mokordomako ka·enba da·o ning·tue sandianirangko dakdapengkua ine u·iataha.
Batanggimin somoirangoba Garo Hills-ni dingtang dingtang biaprango iandake pekatgipa samrangko badingenggipa manderangko police-rang bang·en rim·na man·engahachim.
