SHILLONG: Meghalaya a·dokni Accredited Social Health Activist (ASHA) worker-rang, an·tangtangni man·gnirangko man·tokkujaengani gimin aro uamangni dabiani gita man·gnirangko bariatkujaengani gimin kamrangko dontongate jingjengatengani a·sel COVID-19-ko warachakanio neng·nikanirangko man·na nangengahani gimin jingjengataniko dontonge kamrangko ka·pilchina gita a·dokni Health Minister AL Hek didiataha.
Meghalaya a·doko aro mongsongbate songadam nokadamrango manderangna an·seng baljokanirangko on·na gita rakbee kamrangko ka·engoba ASHA worker-rangna, uamangni bang·gija man·paenggipa tangka paisarangko sorkari on·kujaengani gimin kamrangko dontongatna tik ka·angaha ine re·anggipa Sonibar salo Meghalaya ASHA Workers Union (MAWU)-ni dilgiparang parakatahachim.
MAWU-ni parakatani gitade, COVID-19-ni giroroaniko warachakanio sorkari, batanggimin somoirangoba uamangna tol·e ku·rachakanirangko on·ahani gimin da·o uamang kamrangko dontongatskaengahachim.
Batanggimin somoirangoba iani bidingo union-ni membor-rang, a·dokni Chief Minister aro Health Minister-ko gronge agangrikahachim indiba uamangna ku·rachakanirangko on·nana agrede da·alonan mamingkon dakkujaenga ineba MAWU parakataha.
Indake ong·engon, ia sal somoirango COVID-19-ni giproroaniko warachakna kamrangko ka·engmiting somoi ong·ani gimin ASHA-rangni kam dontongatanichi ramram manderangsa neng·nikanirangko man·skana nangenga ine Health Minister parakatenba, ASHA worker-rangni kam dongtongate jingjengataniko ra·galpilchina aro kamrangko ka·piltaichina gita mol·molataha.
“An·ching manderangni janggirangko jokatani giminsa ia somoio chanchina nangenga, uni gimin kamrangko ka·piltaichina aro manderangni janggirangko jokatchina anga ASHA worker-rangko mol·molenga,” ine Hek parakataha.
Health Minister-ni parakatani gitade, East Khasi Hills a·jani ASHA worker-rangde re·anggipa 2020 bilsini December jaonin an·tangtangni man·gnirangko man·tokkujaengachim indiba gipin biaprango kam ka·enggipa ASHA-rangde ia bilsini March jaonade man·tokahachim.
