TURA: Meghalaya Teacher’s Eligibility Test (MTET) porikkao chu·sokna man·pagijagipa contractual teacher-rangni kamko sorkari bon·atengahani gimin skigiparangna cholko on·taina gita special MTET-ko ong·atskachina All Garo Hills Government Lower Primary Contractual Teachers Association (AGHGLPCTA), Meghalaya sorkariko mol·molataha.
Meghalaya a·doko lekka porani gadangko namdapatna miksonganio a·dok sorkari, contract basis-o skigiparangna Meghalaya Teachers Eligibility Test (MTET)-ko re·anggipa bilsio ong·atahachim. Ia MTET porikkani result-rangko parakanio bang·bata skigiparangan chu·sokna man·jaha aro mitam skigiparangsan chu·sokgipa ong·na man·skaaiahachim.
Indake ong·engon, ru·uta bilsirangna contract-na skigipani kamko ka·paenggipa manderangni kamko bon·atahaode bilsirang re·angahani gimin gipin kamrangkoba ka·e cha·pana chol ong·jawaha ine AGHGLPCTA, skigiparangni kamko bon·atkujachina aro MTET-ko pass ka·na cholrangko on·kuchina gita sorkario mol·molangaha.
“Skigiparangoni mitamde bilsigni aro mitamde bilsi 10 batpile kamko ka·somanaha aro da·o indita bilsirangni ja·mano uamangni kamko bon·atgenchimode skigiparangara maiko dake an·tangtangni nokdangrangko chalaipana man·kugen?” ine association-ni dilgiparang sing·doangenba, skigiparangni kamko bon·atgija dingtangmancha MTET-ko ong·atskachina a·dok sorkariko didiataha.
