TURA: Tura circuit house-oni Tura Civil Hospital-ona dakanggipa ramasamrango me·su samjakrangko palengani a·sel re·ruraenggipa manderang neng·nikanirangko man·engan baksana manderang ia biaprangoniko me·su samjak ra·na neng·take garirangko ramasamrango skatang donenganichi garirangba apchangketaniko man·rongenga ine police official-rang parakatenba, ia rama samrango me·su samjakrangko paljachina gita didiataha.
Koborko on·ani gitade, Tura circuit house-oni Tura civil hospital-ona dakanggipa ramasamrango pale sim·e cha·enggipa manderangko Sombar salon, Najing Bazar-ona apjitatahachim indiba Mongolbar salon me·su palgiparang, ia apsan biapona re·bapile me·su samjakrangko palpiltaiahachim.
“Chinga me·su pale cha·enggipa manderangni obostarangko ma·sichaken dingtang biapona apjitatahachim indiba ia ramasamo me·surangko palengani a·sel ramako re·ruraenggipa manderang aro ia ramao garirang apchangket ong·e neng·nikanirangko man·rongenga. Uni gimin ia biapo me·su samjak palenggiparangko chinga Najing Bazar-ona apjitange ua biapo palskachina mol·molatenga,” ine police official-rang parakataha.