TURA: East Garo Hills a·jani Balsrigittim jolo COVID-19-ko man·giparang dongahani gimin ia jolko micro containment zone dakataha ine East Garo Hills a·jani Deputy Commissioner Swapnil Tembe u·iataha.
Deputy Commissioner-ni u·iatani gitade, ia jolko micro containment zone dakengmiting somoio gipin biaprangoni manderangko ia biap ning·o napna on·jawa aro ia biaprango dongenggipa manderangba ia biaponi gipin biaprangchi ong·katna man·jawa. Ia rama gita re·ruraenggipa gari gorarang re·ruranade man·gen indiba ia jolrango neng·takna man·jawa ine DC u·iataha.
Ia jolrango songdongenggipa manderangko noktangtangon nape dongchina gitaba Deputy Commissioner u·iataha.
Ia jolrangko micro containment zone dakengmiting somoio ia jolrango jinma tom·bimonganirangko aro uandakgipa maming program-rangko ong·atna man·jawa ineba ua u·iataha.
Ia jolo donggipa dokkanrangko chipe dontokna gita nanggen aro manderangna nangchongmotgipa bosturangko ia jolko nirokna donenggipa supervising officer-ni songe on·gipa dolrang, sokate on·skagen.
Gital u·iataniko on·taikujaskal ia jolo donggipa pilak office, skul aro uandakgipa institute-rangkoba chipe donangna nanggen ineba Deputy Commissioner u·iataha.