SHILLONG: Meghalaya a·doko songdongenggipa manderangko COVID-ni tikarangko su·chichatokengahaon salprako komibeoba sak 30,000-oni sak 50,000 manderangko tika su·na gita a·dok sorkari nisan ka·enga.
Health official-rangni u·iatani gitade, da·o sorkario lak 1 tikarang dongani gimin a·doko tika su·aniko bariatna gita sorkari miksongengaha aro bakan lak 2 tikarangba a·dokona sokbana siengaha.
Meghalaya a·dokoba bilsi 18-oni bilsi 44-ona tikarangko su·engahani gimin bang·a manderangan da·o tikarangko su·e ra·tokengaha aro uandaken da·o dipet a·doko sak 80,000-na baten manderang COVID-ni tikarangko su·e ra·manaha ine health official-rang u·iataha.
“A·bachengo manderang tikako su·na jechaktokahaoba da·o bang·a manderangan tika su·na re·batokengaha,” ine official-rang parakataha.
Health official-rangni parakatani gitade, re·anggipa Sombar salsani gisepon, bilsi 18 batgiparangoni sak 11,855 manderangko man·chape gimik pong 13,000 tikarangko su·aha.
Da·o dipet Meghalaya a·dok gimiko sak 6,03,939 manderang tikako su·e ra·manaha aro ianoni sak 5,28,722 manderangde skanggipa tikako aro sak 75,217 manderangde gnigipa tikakoba su·e ra·manaha.