TURA: Meghalaya a·doko gital kulina sienggipa Meghalaya Police (MLP)-ni 7th Battalion-ko South Garo Hills a·jani Baghmara-o headquarter dake kulichina South Garo Hills a·jani dingtang dingtang NGO-rang, a·dok sorkariko didiataha.
NGO-rangni parakatani gitade, ia 7th MLP Battalion-ni headquarter-ko kulina gita Baghmara-on a·arangko on·e da·o kamrangko ka·soengahani gimin sorkari ia battalion-ko Baghmara-o kuligenchimode pilakni gitan dakchakani ong·genchim.
“South Garo Hills a·jani bang·bata biaprangan buringraragipa biap ong·e skangonin bobil dake chakatgipa dolrang ia biaprangon dongnuchakronga aro South Garo Hills a·jao bobil dake chakatgipa dolrangoni bame on·gipa chadamberang bang·en kamgri ong·e dongna nangtokengani gimin ia 7th Battalion-ko Baghmara-o kuligenchimode, pilakni gitan dakchakani ong·gen,” ine NGO-rang parakataha.
South Garo Hills a·jara Bangladesh a·song baksa nangchapgipa biap ong·e skangonin bobil dake chakatgipa manderangni re·ruraanirangko nikna man·ronga aro 7th MLP Battalion-ni headquarter-ko Baghmara-o kuligenchimode iandake bobil dolrangni re·ruraanirangkoba nambate nirok sandina man·gen ineba NGO-rang parakataha.