SHILLONG: Meghalaya a·doko Higher Secondary School Leaving Certificate (HSSLC)-ni bangki subject bri dongkuenggipa porikkarangko ong·atjahawa aro ia subject mingbrina mark-rangko Meghalaya Board of School Education (MBOSE)-ni dongimin niamrango pangchake on·angskagen ine Budbar salo a·dokni Education Minister Lahkmen Rymbui parakataha.
Iani bidingo kobor ra·timgiparangna u·iatengon, Meghalaya a·doko da·o obostarang namkalkujaengani gimin HSSLC-ni bangki dongkuenggipa subject-rang, chong·motan Western Music, Computer Science, Statistics aro Vocational Studies subject-rangni porikkako ong·atna man·jawaha aro ia subject-rangni mark-rangko MBOSE-ni dongimin niamrango pangchake on·angskagen ine Education Minister parakataha.
COVID-19-ni a·sel ia bilsini SSLC aro HSSLC porikkarangko serikna man·gijagipa candidate-rangna July jani gisepo porikkako ra·taigen ineba Education Minister parakataha.
Rymbui-ni parakatani gitade, HSSLC porikkako chu·gimik serikna man·gijagipa chatro chatrirang sak 15 aro SSLC porikkako chu·gimik serikna man·gijagipa chatro chatrirang gimik sak 34 donga.
SSLC-ni mitam subject-rangko serikna man·gijagipa sak 74 aro HSSLC-ni mitam subject-rangko serikna man·gijagipa sak 92 chatro chatrirang donga ineba Education Minister parakataha.
Indake ong·engon, Class XII board porikkani result-ko July 31 tarikna skangan parakatgen ineba Education Minister parakataha.
“SSLC porikkani result-rangko parakna gitade chinga senge nikuna nanggen,” ine Rymbui aganskaaha.
