TURA: West Garo Hills a·jani Asanang primary health centre (PHC)-ni ning·o donggipa song damgittamo bilsi 45 batgimin manderangoni chu·gimikkon tika su·na man·aha ine kobor on·aha.
West Garo Hills a·jani Deputy Commissioner Ram Singh-ni u·iatani gitade, ia songrango donggipa manderang a·bachengode COVID-ni tikarangko su·na jechaktokahaoba, ia songrango manderangna agan-talatanirangko on·anichi aro CCMT-ni tom·anirangko ong·atanichi da·o ia song damgittamon manderang tikarangko su·na gisik nangbattokaha.
Kobor on·ani gitade, Asanang PHC-ni ning·o donggipa Rongram songo bilsi 45 batgimin manderangoni 100 percent aro bilsi 18 batgimin manderangoniba 96 percent tikako su·e ra·tokaha. Allagre songoba bilsi 45 batgimin manderangoni 100 percent tikako su·e ra·manaha aro Jengjal Kama songoba bilsi 45 batgimin manderangoni 100 percent tikako su·e ra·manaha.
Indake ong·engon, ia PHC-ni ning·o donggipa dingtang dingtang songrango tika su·anirang chu·sokgipa ong·engahani gimin West Garo Hills a·jani Deputy Commissioner, PHC-ni doctor aro gipin kam ka·giparangko, Rongram block-ni BDO aro uni manderangko, ICDS-ko, Market committee-ko aro CCMT-koba mittelpilangaha.
Rongram jolrango chu·gimik tika su·na man·na gita re·mikkangbae kamrangko ka·china git aua Rongram block-ni chadamberangkoba didiataha.
