TURA: Re·anggipa Budbar walni 2:00 bajimango, Dadenggre sub-division-ni ning·o donggipa Asimgre songona niam gri napsrukbae, ia songoniko salangengmiting somoio songni manderang truck gari bolsa bolrangko rim·rikna man·aha ine songni manderang u·iataha.
Koborko on·ani gitade, ia sal somoirango pilak biaprangon COVID-19 giproroengani gimin gipin biaprangoni manderangko ia songrango skatang napna on·jaengachim indiba Budbar walo Assam-oni truck gari bolsa, manderangna aro district administration-na u·iatgija ia songona re·bae songni bolrangko sriksrik salangengachim.
Indake ong·genchimoba, songni manderang mikrake nirok sandianirangko dakengani gimin ia gariko aro bolrangko rim·rikna man·aha aro ja·mano gari baksana bolrangko Police aro Forest official-rangna pakwate on·ataha ine kobor on·aha.
Iandake niam gri napdrabae songni nokni bol wa·arangko skatang salanganirangko mikrakbate nirok sandichina gitaba songni manderang, district administration-ko didiataha.
