TURA: Dingtang dingtang songbadrango an·tangko matnange seanirangna GHADC CEM-ni chief adviser Akki A Sangma, suk ong·gijaniko parakatenba, ia pilakan maming pangchakani gri aro politics-ni gita matnangna jotton ka·anirangsan ong·aia ine talataniko on·angaha.
Garo Hills Autonomous District Council (GHADC)-o Akki A Sangma-ko chief executive membor (CEM)-ni Chief Adviser dake songaniko adita salrangna skangsan Tura-ni BJP dol jegalatenba, maio pangchake poraiani gadang chu·onggijagipa mandeko chief adviser songaha ine GHADC-ni CEM-o sing·doangahachim ine nikna man·a.
Indake ong·engon, an·tangni kosako matnanganirangko CEM-ni chief adviser jegalatskaenba, ua skangonin BJP-na kamko ka·gipa mande ong·ani giminsa ia kamko ka·na seokako man·aha ine parakatskaaha.
“2014 bilsionin anga Bharatiya Janata Yuva Morcha-ni membor ong·aha aro 2020 bilsini May 28 tariko angko Meghalaya BJP Yuva Morcha (Youth Wing)-ni vice president songaha. Anga pangnan BJP dolna kakketgipa membor ong·aha indiba angni kosako indake matnanganiranga namen ra·chakna man·gijani aro kragijani ong·aha,” ine CEM-ni chief adviser Akki Sangma parakataha.
Uni poraiani gadangko janape matnanggipani gimin janapatskaengon, iandake uni kosako matnanganiranga pilakan kakket ong·ja aro iandake matnanganirangko songbadrango seanirangba kraani ong·ja ine Sangma parakataha.
Ma·mongni tangka paisarangoniko 1%-ko janape BJP-ni dilgipa Dr M Chuba Ao-ni kosako matnanganirangna aganchakaniko on·angskaengon, iandake matnanganirangba kakket ong·ani dongja aro ian BJP-ni dilgipako aro BJP-ni kosako matnangani gitasa ong·enga ine CEM-ni chief adviser parakataha.