TURA: Meghalaya High Court aro Health & Family Welfare Department-oni ge·etanio pangchake, West Garo Hills a·jani ning·o donggipa pilak dokkanrangon, dokkan nokgipa aro dokkano dongtimgiparangni tika su·a su·gijaniko manderang ma·sina man·na gita dokkanrangko kulina skang, see tape donna nanggen ine West Garo Hills a·jani District Magistrate ge·etaniko on·ataha.
District Magistrate-ni u·iatani gitade, dokkanrangan manderangna salantio dangdike on·enggiparang gita ong·engani gimin dokkan nokgipa aro dokkano dongtimgipa manderangni tika su·a su·gijaniko manderang ma·sie ra·na man·na gita dokkanrango see tape donchina gita ge·etaniko on·angaha.
Manderangko salruraenggipa garirang, jekai taxi, autorickshaw, maxi cab, bus aro uandakgipa garirangba, salrurana on·piltaiahaon, apsan daken gari saltimgipa aro gario kam ka·giparangni tika su·a su·gijaniko gari mikkango see tape donna nanggen ine District Magistrate ge·etangaha.
Dingtang dingtang kamrangko ka·e cha·enggipa manderangkoba an·tangtangni aro an·tangtangni nokdangrangna naljokaniko on·na man·na gita ta·raken tikako su·e ra·china gita District Magistrate u·iataha.
Health & Family Welfare department-ni ge·etanio pangchake je dokkan ba bading chiwalgipa dolrangan, COVID-19-ni tikarangko su·na nangniktokjaengachim, gipinrangna naljokaniko on·skana man·na gita sal 10-prakon an·tangtangko porikka ra·e niskachina gitaba District Magistrate u·iataha.