TURA: Bristibar salo Meghalaya a·dokni PHE Minister Renikton L Tongkhar, Selsella-ni MLA FCA Sangma baksa Greater Garobadha Water Supply Scheme (GGWSS)-ni kamrangko nieaha.
Ia water supply scheme-ni kamrangko nieani somoio kobor ra·timgiparangna talatangengon, Jal Jeevan Mission (JJM)-ni ning·o ian Garo Hills-o dal·batsranggipa water supply scheme-rangoni mingsa ong·enga aro ia scheme-na sorkari gong kror 107 tangkarangko chame on·aha ine PHE Minister parakataha.
Ia Greater Garobadha Water Supply Scheme-ni kamrangko matchotahaode Garobadha jolo donggipa dam 96 songrangna chirangko chu·onga gita on·na man·gnok ineba PHE Minister parakataha.
Kamrangko adita jarangna skangsan a·bachengataoba 50 percent-ni gitade kamrang matchotmanaha ine talatangengon, re·baenggipa 2022 bilsini December jani gisepode chirangko nokantionan sale on·na man·na gita ia kamrangko somoi gita matchotatchina ua contractor-rangko didiangaha.
