SHILLONG: Delta plus gita dakgipa COVID-oni ong·katgipa siatgnigipa sabisini rokomrang a·songni dingtang dingtang biaprango satokengon, COVID-19 sabisioni manderangni nambatgipa naljokanide tikka su·e ra·anian ong·aia ine DHS (MI) Dr Aman War aganaha.
A·doko da·oba COVID man·giparang salantian bang·engkuani bidingo sing·anina aganchakengon, ian bang·bataiengade ong·ja indiba manderangni saksa sakgipin baksa gronggrikani giminsa sabisirang gipengkua ine Dr War aganchakaha.
Delta plus gita dakgipa COVID-oni ong·katgipa rokom sabisirangni, gipin a·dokrango ong·katengani gimin sing·anina aganchakengon, ia gital nakatgipa sabisini rokom namen gipningbata ine Dr War aganaha.
Ua indakeba aganaha je, a·doko bilni nalsaona sokangpile COVID man·giparang dongode, uamangna namen neng·beani ong·gen, unigimin indakgipa obostarangona sokangna skangan champengsoaniko dakna nangchongmotenga, uarangoni mongsongbatgipa kamde, manderangni tikka su·e ra·anian ong·gen, maina tikka su·manaha ong·ode be·eno sabisi napajoljolan immunity ba an·chini bil warachaksoa ine Health Director aganaha.
Mask ganjringani, sanitizer jakkalani aro mandeskaoni chel·grikaniko rakkiani bewalko pangnan ja·rikna nanggen ine agantaitaiengon, tikka su·giminrangde, skanggipa tikkako su·engkua ong·oba, maibakae COVID man·genchimoba bilsue saaonide naljokaniko nikna man·enga, War aganaha.
“Be·eno saa donggiparang COVID man·omangba, tikka su·jokode uamangba namoilna gita man·a. Tikka su·gimin aro su·kugijagiparangni COVID man·e saanio namen dingtang grikani donga’’ Dr War agandapaha.
