SHILLONG: Da·o dipet Khasi Hills a·jani bang·bata songrangon COVID-ni tikarangko chu·gimik su·na man·kujaengoba Garo Hills-ni bang·a songrangon tika su·na chol man·enggipa manderang, chu·gimik su·e ra·tokna man·engahani gimin COVID-ni tikako su·anio Garo Hills-on ta·rakbatenga ine nikna man·aha.
Koborko on·ani gitade, East Garo Hills a·jaoba song damgittamode, bilsi 45 batgimin aro bilsi 18 batgimin manderangko chu·gimik tika su·na man·aha. South West Garo Hills a·jaoba dingtang dingtang primary health centre (PHC)-ni ning·o donggipa dam 23 songrango chu·gimik tika su·ani matchotangaha.
South Garo Hills a·jaoba Maheskola PHC-ni ning·o donggipa song damgittamo, bilsi 45 batgimin manderangko chu·gimik tika su·na man·aha aro West Garo Hills a·jaoba Asanang PHC-ni ning·o donggipa Rongram, Jengjal Kama aro Allagre songrango bilsi 45 batgimin manderangko 100 percent aro bilsi 18-oni bilsi 44-onade 96 percent tika su·manaha. West Garo Hills a·jani Depotagre songoba bilsi 45 batgimin manderangoni chu·gimikkon tika su·na man·aha.
Ri Bhoi a·jao Bhoirymbong CHC-ni ning·o donggipa Umdohmyrthih songo 95 percent tika su·na man·aha.
East Khasi Hills a·jani bidingo janapatskaengon, RR Colony-ode bilsi 45 aro bilsi 18 batgimin pilakkon chu·gimik tika su·na man·aha aro Mawkliaw PHC-ni ning·o donggipa Kemrang songoba bilsi 45 batgimin manderangkode chu·gimik tika su·na man·aha ine sorkari official-rang parakataha.
Meghalaya a·dokoba COVID-ni tikarangko ta·rakbate su·na gita re·anggipa antirangonin a·dok sorkari, tika su·ani program-rangko bilakbatatahachim aro uandaken da·ororo salantian komibeoba sak 1000 manderangkode salprakon tika su·engahachim.