SHILLONG: Sukrobar pringo truck gari bolsa brake nosto ong·changenba, Shillong songjinmani Mawblei jolo a·sel ong·aha aro ia gari a·sel ong·anichi saksa siangna nangaha aro sakgipin saknaanirangko man·aha.
Police-rangni u·iatani gitade, Sukrobar pring 5:00 bajimango, AS-01DC 8200 truck gari bolsa, dokdarangko gatenba, Jowai-oni Assam-ona re·angengachim indiba Shillong songjinmani Mawblei jolo ia garini brake nosto ong·changenba a·sel ong·aha.
Ia truck gari bikpileke a·sel ong·anio gariko saltimgipa, gari ning·on sikamaha aro uko dakchakgipa sakgipin mande, adita sakaanirangko man·skana nangaha.
Koborko on·ani gitade, a·sel ong·anio sianggipa mandeara Assam a·dokni Morogaun minggipa songoni ong·achim.
