SHILLONG: Meghalaya a·doko da·obatai salbri mangna joljol, COVID-oni nampilgiparangna batede sabisi man·dapgiparangan bang·battaienga. Indake mijal Sukrobar salni bako sak 602 manderang COVID sabisiko man·dapaha aro sak 354 manderang sabisioni nampilaha. Unomitingo COVID man·e sianggiparangba tang·doa tang·ona dake dongenga, jeon mijaloba sak 7 manderang COVID man·e siangtaiaha.
Sukrobar salo sak 602 COVID man·dapgiparangoni EKH-o sak 134, WGH-o sak 126, WJH-o sak 119, Ri-Bhoio sak 84, EJH-o sak 43, NGH-o sak 23, EGH-o sak 20, WKH-o sak 18, SGH-o sak 17, SWGH-o sak 14 aro SWKH-oni sak 4.
Ia apsan somoion sak 354 COVID man·giparang sabisioni nampiltokaha, uamangoni EKH-o sak 124, WJH-o sak 56, WGH-o sak 47, SWGH-o sak 27, NGH-o sak 25, EGH-o sak 21, SGH-o sak 16, EJH-o sak 16, WKH-o sak 12, Ri-Bhoio sak 5 aro SWKH-oni sak 5 manderang COVID-oni nampiltokaha.
Sukrobar salni bako A·dokni dambri district-rango sak 7 manderang COVID man·e siangaiaha. Uamangoni West Jaintia Hills-o sak 3, East Khasi Hills-o sak 2, East Garo Hills aro West Khasi Hills-o sakprak dake siangaha.
Meghalaya a·doko COVID man·giparang mijalo gimikchi sak 47,480 gapangaha, uamangoni sak 42,001 manderang sabisioni nampiltokaha, aro sak 814 manderang sabisio siangaha, indake da·o sak 4,665 manderang a·doko COVID man·e dongengkua.
