SHILLONG: Re·baenggipa Sombar sal dipetde mande salruragipa garirangkoba East Khasi Hills a·jao bang·gija watgnok ine sorkarioni u·iataha.
Meghalaya a·dokni Health Minister AL Hek-ni u·iatani gitade, Sukrobar salo a·dokni Cabinet tom·e chanchirimangenba, mande salruragipa garirangko Shillong-o 15 percent aro East Khasi Hills a·jani gipin biaprango 30 percent watna tik ka·angaha.
High Court-ni ge·etanio pangchake East Khasi Hills a·jao mande salruragipa garirangko bang·gija watna tik ka·angaha indiba da·o dipet bus garirangkode salrurana on·kujawa ineba Health Minister parakataha.
Taxi salgiparangba manderangko salruraengon, an·tangtangni tika su·ani certificate-rangko gari mikkango tape donna nanggen.
East Khasi Hills a·jao aro mongsongbate Shillong songjinmao donggipa hotel ba restaurant-rangna donatgipa gital niamrangni gimin janapatengon, restaurant-rangko kulina man·gen indiba manderangko restaurant ning·o nape cha·na on·kujawa aro cha·anirangko noktangtangona bi·atna aro ra·angna gitasan on·kuaigen ine Health Minister parakataha.
Songadam nokadamrangoba cha dokkanrangko kulina on·gnok indiba dokkan ning·o nape cha·na ringna on·kujawa.
Indake ong·engon, COVID man·e corona care centre-rango dongenggipa manderangna sorkari, nangchongmotgipa bosturangko suale on·gnok ine Health Minister parakataha.
Iana skangde, COVID man·e noktangtango dingtang nape dongenggipa manderangnasan sorkari iandakgipa bosturangko on·engachim ine nikna man·a.
