SHILLONG: Meghalayao batanggimin konta 24-ni gisepo sak 462 manderang COVID-19 sabisiko man·dapaha aro ia apsan somoini bakon sak 570 manderang COVID sabisioni nampilskaha. Indake ong·engon, COVID man·e sianggiparang mijalode namen komiaha, jeon mijalode gipin salrangna bate komibate sak 2 manderangsan COVID man·e siangaha.
Batanggimin konta 24-ni gisepo sak 462 COVID man·dapgiparangoni EKH-o sak 153, Ri-Bhoio sak 70, WJH-o sak 51, SWKH-oni sak 43, WGH-o sak 37, NGH-o sak 34, EGH-o sak 28, SWGH-o sak 16, EJH-o sak 15, WKH-o sak 13, SGH-oni sak 12.
Ia apsan somoion sak 570 COVID man·gipa manderang a·dokni dingtang dingtang biaprango sabisioni nampiltokaha, uamangoni EKH-o sak 186, SWKH-oni sak 79, Ri-Bhoio sak 78, WGH-o sak 57, SGH-o sak 41, EGH-o sak 37, SWGH-o sak 29, WJH-o sak 23, WKH-o sak 18, NGH-o sak 17 aro EJH-oni sak 5 manderang COVID-oni nampiltokaha.
Indake mijal Robibar salni bako East Khasi Hills aro Ri-Bhoi district-rango sakgni manderang COVID man·e siangtaiaha.
Meghalaya a·doko COVID man·giparang mijalona gimikchide sak 48,447 gapangaha, uamangoni sak 43,070 manderang sabi-sioni nampiltokaha, aro sak 819 manderang sabisio siangaha, indake da·o sak 4,558 manderang a·doko COVID man·e dongengkua.
