SHILLONG: Mairang sub-division-ko da·o August-ni 15 tariko a·songni jakgitelaniko manina skangan sorkari, a·dokni gital district ba a·ja songgnok.
Iani bidingo kobor ra·timgiparangna u·iatengon, Mairang sub-division-o pilakni gitan namroro silroroanirangko nikna man·jaengani gimin sorkari, Mairang-o songdongenggipa manderangna sorkarini kamrangko sepangbatatna gita da·o August 15 tarikna skangan gital district songgnok ine Sombar salo a·dokni Chief Minister Conrad K Sangma parakataha.
“Meghalaya a·doko Mairang-ba gital a·ja ine channako man·gnok indiba ia sal somoirango COVID-19-ni a·sel kamrang ja·donggatako man·na nangkuenga. Indake ong·genchimoba, chinga Mairang-o songdongenggipa manderangna iako ku·chakenga aro Mairang-ko da·o August 15 tarikna skangan gital a·ja songgnok,” ine Chief Minister parakataha.
Garo Hills-o dingtang a·jana dabienggiparangni gimin sing·on, West Garo Hills-ba damsa dal·begipa a·ja ong·a ine nikengani gimin a·dokni Power Minister aro Dadenggre-ni MLA James K Sangma-ba, Dadenggre-ko district songchina dabiani bidingo baditaba chang uko gronge agangrikahachim indiba da·o dipet sorkari iani bidingo maming ja·kurangko de·na man·kujaenga ine Chief Minister parakataha.
Apsan daken Sohra sub-division-ko songchina dabienggipani giminba Chief Minister talataniko on·angengon, da·o dipet Sohra-ko district songna gita geographical map-rangko salna man·kujaenga aro iani bidingo songgigrikanirangko dakani ja·manosa sorkari ja·kuko de·angna man·gen ine Chief Minister parakataha.