SHILLONG: Meghalaya Energy Corporation Limited (MeECL)-o kam ka·e kamoni neng·takgimin manderang batanggimin jagnini pension-rangko man·kujaengani a·sel neng·nikanirangko chagrongna nangtokengahaon, kamoni neng·takgimin pensioner-rangna re·anggipa April aro May jani pension-rangko on·na gita Sombar salo MeECL tik ka·angaha.
MeECL-ni pensioner-rangna batanggimin jarangni man·gnirangko on·kujaengani gimin Sombar salo, MeECL Pensioners Association (MPA)-ni dilgiparang, MeECL-ni chairman-cum-managing director-ko gronge agangrikangon, pensioner-rangna jagnini man·gniko on·china ua sorkariko didiataha ine MPA-ni dilgiparangna parakataha.
Koborko on·ani gitade, da·o dipet MeECL-o kamko ka·e neng·takgimin gimik sak 2,600-mangni gita pension-o pangchake janggi tangenggiparang dongachim aro uamangna batanggimin jagnini pension-rangko on·kujaengani gimin uamang Sombar salo jingjengataniko dakna manchiangahachim.
“Kamoni neng·takgimin manderang aro uamangni nokdangrang, pension-ko man·tokkujaengani a·sel neng·nikanirangko chagrongna nangtokengani gimin jagnini pension-ko watatchina anga sorkariko didiataha. Anga bebera·a sorkariba apsan ge·etaniko on·anggen,” ine MeECL-ni CMD ong·e kamko watangenggipa Arun Kembhavi, kobor ra·timgiparangna parakataha.
Apsan daken, MPA-ni president Marius Kharkongor-ba, pensioner-rangna jagnini man·gniko on·na ku·rachakatahani gimin an·tangni kusi ong·aniko parakataha aro ia jagnini pension-ko uamangna ia antini gisepon on·gen ine parakataha.